Prizren, 24.09.2025

Megjithëse Prizreni tashmë disponon një program inkubimi për biznese fillestare, rajoni ka ende nevojë për një qasje më ambicioze dhe një fokus më të theksuar në zhvillimin e ideve cilësore e inovative të mbështetura nga vendosmëria për sukses. Makerspace Innovation Center Prizren ka qenë gjithmonë iniciator i forcimit të këtyre programeve, duke krijuar mundësi të reja dhe me vlerë jo vetëm për komunitetin local, por edhe më gjerë.

Për t’iu përgjigjur kësaj nevoje, u hartua një iniciativë edukuese – Startup Bootcamp. Thirrja për pjesëmarrje në këtë ngjarje zgjoi një interesim të jashtëzakonshëm me rreth 100 aplikime, ku 80 prej tyre u përzjodhën si pjesëmarrës, të cilët formuan 25 ekipe. Gjatë kësaj ngjarjeje, të rinjtë ndërmarrës u sfiduan, u trajnuan dhe hodhën hapin e parë drejt rafinimit të ideve të tyre, duke fituar njohuri të reja dhe besimin për të vazhduar më tej.

Kjo përpjekje shërbeu si bazë për nisur Edicionin e 3-të të Programit Idea-to-Scale, një program ekskluziv 6-mujor inkubimi, i cili mbështet startup-et në fazat e hershme të zhvillimit. Nga mbi 20 aplikime, në fazën e inkubimit u përzgjodhën 9 startup-e.

Gjatë këtij programi, ekipet patën qasje në një gamë të gjerë mbështetjesh, përfshirë:

• Mentorim nga ekspertë vendorë dhe ndërkombëtarë;
• Mbështetje për validimin e tregut;
• Qasje në financa dhe zhvillimin e planeve të qëndrueshme;
• Trajnime mbi marketingun, brendimin dhe shitjet;
• Përgatitje për investime dhe pitching.

Në total, startup-et kanë ndjekur mbi 90 orë mentorimi grupor dhe individual, duke ndërtuar hap pas hapi bazat e biznesit të tyre. Në përmbyllje të programit, këto 9 ekipe prezantuan para publikut rrugëtimin e tyre, vizionin e ardhshëm dhe progresin e arritur gjatë muajve të inkubimit.

Kryetari Totaj, i pranishëm në këtë ngjarje, theksoi se, “Prizreni gjithmonë ka qenë një qytet i ideve dhe krijimtarisë. Me programe si ky, po krijojmë një mjedis ku të rinjtë tanë mund t’i shndërrojnë ëndrrat e tyre në biznese të qëndrueshme. Makerspace Innovation Center ka dëshmuar me punën e vet se është një partner i çmuar në fuqizimin e rinisë dhe në zhvillimin e ekosistemit të startup-eve në qytetin tonë.” 

Në anën tjetër, një prej partnerëve kyç për programin, Drejtori i Parkut ITP Prizren Hans Juergen Cassens tha se, “Si Park i Inovacionit dhe Trajnimit kemi krijuar së bashku një mjedis ku idetë e reja marrin jetë dhe ku të rinjtë e Kosovës kanë mundësi të zhvillojnë aftësitë e tyre. Ky program ka treguar se me mbështetjen e duhur, kreativiteti dhe vendosmëria e të rinjve mund të shndërrohen në projekte konkrete me potencial të madh për tregun vendor dhe ndërkombëtar.”  

Dita e Prezantimeve shënoi kulmin e punës së tyre shumëmujore dhe një hap të rëndësishëm drejt zhvillimit të ekosistemit të startup-eve në Kosovë.