Në kuadër të programit Entrepreneur in Development, studentët e Universitetit “Ukshin Hoti” – Prizren kanë përfunduar me sukses praktikën njëmujore e cila kishte fokus zhvillimin e aftësive dhe njohurive në fushën e hulumtimit, biznesit dhe inovacionit. Ky program u mundësoi studentëve që të përvetësojnë shkathtësi praktike në validimin e problemeve dhe analizën e të dhënave, duke i përgatitur për hyrje në ndërmarrësi.

Gjatë këtij programi, studentët morën pjesë në punëtori ku mësuan metodat e mbledhjes dhe analizës së të dhënave. Ata përdorën këto teknika për të validuar një problem real në komunitet, duke zgjedhur temën “Vështirësitë e individëve për gjetjen e banesave me qira dhe për blerje në Prizren”. Pas përfundimit të hulumtimit, studentët paraqitën gjetjet e tyre dhe ofruan rekomandime për avancimin e mëtejshëm të tregut të patundshmërisë.

Qëllimi i këtij programi ishte t’u ofronte studentëve një bazë të fortë njohurish në fushën e hulumtimit dhe mbledhjes së të dhënave, për t’i përdorur më pas për validimin e problemeve në fushën e ndërmarrësisë. Këto aftësi janë të rëndësishme sepse u mundësojnë individëve të sigurohen që një ide ka potencial për t’u realizuar me sukses dhe se ja vlen të investohet kohë dhe mund në të, duke u mbështetur në të dhëna faktuale.

Studentët tani janë të përgatitur për të ofruar zgjidhje inovative dhe për të kontribuar në zhvillimin e mundësive të reja në komunitet dhe në sektorin e patundshmërisë.

Ky program është realizuar falë bashkëpunimit të Makerspace Innovation Center Prizren dhe Universitetit “Ukshin Hoti” Prizren